NASA-ს ზონდ "ჯუნოს" მონაცემების მიხედვით, იუპიტერი იმაზე ოდნავ მცირე ზომისაა, ვიდრე ათწლეულების განმავლობაში მიიჩნეოდა. ამის მიუხედავად, ის მაინც მზის სისტემის უდიდეს პლანეტად რჩება.

ამ გიგანტური ციური სხეულის ზომა დაახლოებით 50 წლის წინ Voyager-ისა და Pioneer-ის ზონდების დაკვირვებების მეშვეობით განსაზღვრეს, რისთვისაც ამ მისიების დროს რადიოსიგნალები გამოიყენეს. ახლა იქ "ჯუნო" მოძრაობს და 2016 წლიდან მოყოლებული, ინფორმაციას აგროვებს. მისი რადიომონაცემებით მეცნიერებმა დაადგინეს, რომ იუპიტერის ზომა თითოეული მიმართულებით 400 მეტრით ნაკლებია.

სპეციალისტები ამბობენ, რომ ზომისა და ფორმის შესახებ დასკვნების გამოტანა პლანეტასთან დისტანციისა და მისი ბრუნვის გაანალიზებითაც შეიძლება, მაგრამ უფრო ზუსტი გაზომვა ბევრად რთულ მეთოდებს საჭიროებს.

ასტრონომებმა შეისწავლეს, როგორ მრუდდება "ჯუნოს" მიერ დედამიწაზე გამოგზავნილი რადიოსიგნალები იუპიტერის ატმოსფეროში გავლისას. ამან მათ საშუალება მისცა, გაეთვალისწინებინათ პლანეტზე მქროლავი ქარი, რომელიც აირისგან შემდგარი ციური სხეულის ფორმაზე ზემოქმედებს.

ახალი და ძველი მონაცემების სხვაობა.

ფოტო: Weizmann Institute of Science

ეს ინფორმაცია მათ მისი ფორმისა და ზომის გამოსათვლელად გამოიყენეს. აღმოჩნდა, რომ იუპიტერის რადიუსი პოლუსიდან ცენტრამდე წინა მაჩვენებელს 12 კილომეტრით ჩამოუვარდება და 66 842 კილომეტრს შეადგენს; ეკვატორის რადიუსი 71 488 კილომეტრია, რაც წინა მაჩვენებელზე 4 კილომეტრით ნაკლებია.

ასე მზის სისტემის გიგანტური პლანეტის მახასიათებლები გრავიტაციულ და ატმოსფერულ მოდელებს უკეთ ერგება. ეს მიგნება მისი შიდა სტრუქტურის უკეთ გამოკვლევაში დაგვეხმარება და მსგავსი ტიპის შორეული ეგზოპლანეტების ევოლუციაშიც გაგვარკვევს.

ავტორთა ნაშრომი გამოცემაში Nature Astronomy გამოქვეყნდა.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, გამოიწერე ჩვენი ინსტაგრამი.