10 ნოემბერს, ვენაში, პატიმრობაში მყოფი "ბათუმელებისა" და "ნეტგაზეთის" თანადამფუძნებელი და დირექტორი მზია ამაღლობელი პოლ ვაიზის პრემიით დააჯილდოვეს. ამის შესახებ ინფორმაციას და ფოტომასალას გამოცემა "ბათუმელები" ავრცელებს.

მათი ცნობით, პრემია სიმამაცისთვის გადაეცემათ იმ პირებსა და ორგანიზაციებს, რომლებმაც განსაკუთრებული წვლილი შეიტანეს ადამიანის უფლებების დაცვაში.

მზია ამაღლობელს სიმამაცისთვის პრიზი გადაეცა ჟურნალისტიკის კატეგორიაში.

დაჯილდოების ცერემონიას ვენაში "ნეტგაზეთის" მთავარი რედაქტორი ნესტან ცეცხლაძე და "ბათუმელების" მთავარი რედაქტორი, ეთერ თურაძე ესწრებოდნენ.

ვინ არის პოლ ვაისი?

პოლ ვაისი 1907 წლის 19 მარტს, ვენაში, ებრაულ მეწარმეთა ოჯახში დაიბადა. მან ვენის უნივერსიტეტში საერთაშორისო სამართლის დოქტორის ხარისხი მიიღო და 1934 წელს, მამის გარდაცვალების შემდეგ, მისი ბიზნესი ჩაიბარა. ის და მისი ოჯახი 1938 წელს დაჰაუს საკონცენტრაციო ბანაკში გაგზავნეს, სადაც მისი დედა და დები დაიღუპნენ. ამის შემდეგ მან გადაწყვიტა, ყველაფერი გაეკეთებინა იმისთვის, რომ სხვები მსგავსი ბედისწერისგან დაეცვა და მთელი თავისი ცხოვრება ლტოლვილების დაცვას მიუძღვნა.

ომის დასრულებიდან ოთხი წლის შემდეგ, პოლ ვაისი ლტოლვილთა საერთაშორისო ორგანიზაციის დაცვის პირველი დირექტორი გახდა. ის იყო გაეროს ლტოლვილთა უმაღლესი კომისრის მოადგილე და იურიდიული დეპარტამენტის ხელმძღვანელი. იქ მან მნიშვნელოვანი როლი ითამაშა ჟენევის ლტოლვილთა კონვენციის შემუშავებაში, რომელმაც ლტოლვილთა დაცვა უზრუნველყო და რომელიც დღესაც ძალაშია. ამას გარდა, პოლ ვაისმა ფუნდამენტური წვლილი შეიტანა თავშესაფრისა და ლტოლვილთა სამართალში. მას სიკვდილის შემდეგ გაეროს ლტოლვილთა უმაღლესი კომისარიატის ნანსენის ლტოლვილთა ჯილდო მიენიჭა .

"ჩვენი მისიაა, გვახსოვდეს ეს დიდი ავსტრიელი. ამიტომ, დავაარსეთ პოლ ვაისის პრემია, რომელიც ადამიანის უფლებების დაცვის საქმეში შეტანილ განსაკუთრებულ წვლილს მიაგებს პატივს. ამ გზით, გვსურს ვაჩვენოთ, რომ ამ სამყაროში ჯერ კიდევ ბევრი გამბედაობა, ადამიანობა და თანაგრძნობაა და უამრავი ადამიანია, ვინც მთელი გულით უძღვნის თავს სხვების დახმარებას - ისევე როგორც პოლ ვაისი აკეთებდა ამას", — წერია ვებგვერდზე.