სომხეთის საგარეო საქმეთა სამინისტროში ევროპული ინტეგრაციის დეპარტამენტი იქმნება. შესაბამისი გადაწყვეტილება პრემიერმინისტრმა ნიკოლ ფაშინიანმა მიიღო. ამის შესახებ სომხური მედია წერს.

სამინისტროში სტრუქტურული ცვლილებების შესახებ გადაწყვეტილების ტექსტის თანახმად, ახალი დანაყოფი შესაბამისი სტრუქტურების ევროპის დეპარტამენტიდან გამოყოფით შეიქმნება. პოლიტიკური დაგეგმვის დეპარტამენტი კი დიპლომატიური საქმიანობის კოორდინაციის დეპარტამენტთან გაერთიანდება.

აპრილში, სომხეთის პრეზიდენტმა ვაჰაგნ ხაჩატურიანმა ხელი მოაწერა კანონს, რომლითაც ქვეყნის ევროკავშირში გაწევრიანების განზრახვის შესახებ გამოცხადდა. ნიკოლ ფაშინიანის თქმით, დოკუმენტი არ წარმოადგენს წევრობის ოფიციალურ განაცხადს. ის უბრალოდ ასახავს ევროკავშირთან პარტნიორობის გაღრმავების სტრატეგიულ კურსს. გაწევრიანების შესახებ გადაწყვეტილების მისაღებად საჭიროა რეფერენდუმი და ევროკავშირის ყველა წევრი სახელმწიფოს თანხმობა.

ამას გარდა, სომხეთის მთავრობამ შეიმუშავა სტრატეგია და რეფორმების პროგრამა, რომელიც განხორციელდება მანამ, სანამ ქვეყანა არ დააკმაყოფილებს ევროკავშირში გაწევრიანების აუცილებელ კრიტერიუმებს.

საგულისხმოა, რომ რუსეთი ერევნის ევროკავშირში და ევრაზიულ ეკონომიკურ კავშირში ერთდროულ წევრობას შეუძლებლად მიიჩნევს.