იურიდიულ საკითხთა კომიტეტში სექსუალური შევიწროების შესახებ თამარ ხიდაშელისა და თამარ კორძაიას მიერ ინიცირებული კანონპროექტი მეორე მოსმენით განიხილეს და მას მხარი დაუჭირეს.

შინაგან საქმეთა სამინისტროს წარმომადგენლის განცხადებით, უწყება იზიარებს აღნიშნულ პრობლემასა და გამოწვევას, თუმცა კანონპროექტის მიღების შემთხვევაში, მუხლის გამოყენება შსს-ს გაუჭირდება:

"პოლიციელთა მხრიდან რთულად განჭვრეტადი იქნება სხვადასხვა ქცევის მიზნის დადგენა, რამდენად გამოიწვია მან პირის ღირსების შელახვა, ან მისთვის დამამცირებელი გარემოს შექმნა".

აღნიშნულ პოზიციას კანონპროექტის ერთ-ერთმა ავტორმა თამარ ხიდაშელმა უპასუხა, რომ იმის გამო, რომ შსს-ს პრობლემები შეექმნება, სფერო რეგულირების გარეშე არ უნდა დარჩეს და უნდა არსებობდეს კანონიერი ბერკეტი, რომელიც სექსუალური შევიწროების მსხვერპლ პირებს თავის დაცვის საშუალებას მისცემს.

ხიდაშელმა სექსუალური ხასიათის ქცევის განმარტებისას განაცხადა, რომ შეუძლებელია იმაზე მეტი კონკრეტიკა რაც მოცემულია დეფინიციაში, რადგან აღნიშნული კანონმდებლობის რეგულირების სფეროს სცილდება:

"ვერ ჩავწერდით, რომ ეს შეიძლება იყოს ჩქმეტა, ბწკენა, ხელის მოთათუნება, უწმაწური ხასიათის მოკლე ტექსტური შეტყობინებების ან ვიდეოს გაგზავნა და ა.შ. ამას კანონმდებლობით ვერ გავწერდით".

თამარ კორძაიას განცხადებით, აღნიშნულ კანონპროექტთან დაკავშირებით ბუნებრივი შეკითხვები ჩნდება თუ როგორ შეიძლება დამტკიცდეს. თუ ვერ დაამტკიცებს ადამიანი რომ მის მიმართ ჰქონდა ადგილი სექსუალურ შევიწროებას, თავისთავად არავინ არ დაჯარიმდება:

"ეს რისკები რა თქმა უნდა ახლავს, მაგრამ ეს ხომ არ არის იმის საპირწონე, რომ იმ შემთხვევაში, თუკი ადამიანი მობილიზებულია და შეუძლია საკუთარი ინტერესების დაცვა და შეუძლია წარმოადგინოს მტკიცებულებები, მას უარი ვუთხრათ ამ ტიპის დაცვაზე?"

კომიტეტის თავმჯდომარის, ვახტანგ ხმალაძის, თქმით, სექსუალური შევიწროების პრობლემა არსებობს, თუმცა მთავარია ის, თუ როგორ მოხდება ინტერპრეტაცია, სად გადის ზღვარი შეფასებაში, არის ეს თუა არა სექსუალური შევიწროება.

"სხვადასხვა ადამიანმა სხვადასხვანაირად უნდა მიიღოს ეს საკითხი. ერთმა შეიძლება ჩათვალოს სექსუალური შევიწროებად, მეორემ არა. მე ვერ ვხედავ სხვა გამოსავალს, გარდა იმისა, რომ შევცუროთ წყალში და შევხედოთ, თუ როგორ წავა პრაქტიკა".

კანონპროექტით პასუხისმგებლობა დამძიმდება, თუ შრომითი ურთიერთობების დროს ხდება სექსუალური შევიწროება ზემდგომი თანამდებობის პირის მიერ. ადმინისტრაციული პასუხისმგებლობა მძიმდება იმ შემთხვევაში, თუ ერთი და იგივე პირი ამას განმეორებით ჩაიდენს.

პროექტის ინიციატორმა, რესპუბლიკური პარტიის წევრმა თამარ ხიდაშელმა On.ge-სთან საუბარში განაცხადა, რომ კანონპროექტის შედგენის ერთ-ერთი მიზეზი საქართველოს სახალხო დამცველის 2015 წლის ანგარიში იყო, რომლის მიხედვით, სამუშაო ადგილას განხორციელებული სექსუალური შევიწროება ყველაზე მეტად გავრცელებული ქმედებაა. მისივე თქმით, საკანონმდებლო ინიციატივის კიდევ ერთი მიზეზი გახდა ის, რომ ტელეკომპანია იმედის ერთ-ერთმა თანამშრომელმა პროდიუსერს ბრალი დასდო სექსუალურ შევიწროებაში.

დღეს არსებული კანონმდებლობით, გენდერული თანასწორობის კანონის მიხედვით, შრომითი ურთიერთობების დროს დაუშვებელია სექსუალური ხასიათის არასასურველი ფიზიკური ქცევა. მიუხედავად ამისა, თუკი ასეთ შემთხვევა მაინც მოხდება, დაზარალებულს არ აქვს საშუალება, რომ თავისი უფლებები დაიცვას.

კანონპროექტის მიხედვით, თუ პირს სექსუალურად ავიწროებენ შრომითი ურთიერთობისას, პირველ შემთხვევაში გათვალისწინებულია დაჯარიმება 500 ლარის ოდენობით. თუ ეს ქმედება განმეორდა, მაშინ ჯარიმა 1 000 ლარამდე გაიზრდება. თუ იგივე ქმედება ჩადენილია სამსახურებრივად დაქვემდებარებული პირის მიმართ მაშინ პროექტის ინიციატორები მიზანშეწონილად მიიჩნევენ 2 000-ლარიან ჯარიმას, ხოლო, იმ შემთხვევაში, თუ უფროსი სამსახურებრივად დაქვემდებარებული პირის მიმართ ამას ახორციელებს ერთი წლის განმავლობაში რამდენჯერმე, ამ შემთხვევაში ადმინისტრაციული სასჯელი 2 500 ლარამდე გაიზრდება.

პროექტის ინიციატორის თქმით, ადმინისტრაციულ სამართალდარღვევათა ოქმს შსს-ს წარმომადგენელი შეადგენს და გადასცემს რაიონულ საქალაქო სასამართლოს, რომელიც საბოლოო გადაწყვეტილებას გამოიტანს.