რუსეთის პრეზიდენტმა ვლადიმერ პუტინმა მოსკოვში ისეთი თეატრის შექმნის ბრძანება გასცა, რომელიც „პატრიოტული ხასიათის“ თანამედროვე დრამის პოპულარიზაციაზე იქნება ორიენტირებული, ნათქვამია მისი ინსტრუქციების სიაში, რომელიც 25 მარტს კულტურისა და ხელოვნების საბჭოს სხდომის შემდეგ გამოქვეყნდა. ამის შესახებ რუსული მედია წერს.

ბრძანება გადაეცა მოსკოვის მთავრობას, კულტურის სამინისტროს, კულტურისა და ხელოვნების საბჭოს და საზოგადოებრივ ორგანიზაცია "რუსეთის მწერალთა კავშირს", ხოლო მისი შესრულების ვადა 30 ნოემბერია. პატრიოტული დრამატული თეატრის შექმნაზე პასუხისმგებლად მოსკოვის მერი სერგეი სობიანინი, კულტურის მინისტრი ოლგა ლიუბიმოვა და პრეზიდენტის თანაშემწე ვლადიმერ მედინსკი დაინიშნნენ.

როგორც რუსული მედია წერს, რუსმა მწერალმა ზახარ პრილეპინმა წამოაყენა ასეთი თეატრის შექმნის მოთხოვნა.

მისი თქმით, თანამედროვე ლიტერატურის ნაწარმოებები, მათ შორის "უკრაინაში სამხედრო ოპერაციისადმი" მიძღვნილი ნაწარმოებები, თეატრალურ დადგმებში უნდა აისახოს. "მოსკოვში მხოლოდ 90 თეატრი გვაქვს. მწერლებს საკუთარი თეატრი რომ ჰქონდეთ, ეს, რა თქმა უნდა, მნიშვნელოვნად შეგვიმსუბუქებდა საზრუნავს", — თქვა პრილეპინმა.