საინფორმაციო სააგენტო Reuters-ის ცნობით, აშშ-ის წარმომადგენლებმა, რომლებსაც სურთ კიევმა ვაშინგტონისთვის ხელმისაწვდომი გახადოს უკრაინის ბუნებრივი რესურსები, წამოჭრეს საკითხი, რომ შესაძლოა, უკრაინას შეეზღუდოს წვდომა ილონ მასკის Starlink-ის სატელიტურ საინტერნეტო სისტემაზე.

ეს საკითხი დისკუსიებში აშშ-ის და უკრაინის ოფიციალურ პირებს შორის მას შემდეგ წარმოიშვა, რაც ვოლოდიმირ ზელენსკიმ უარი თქვა აშშ-ის სახაზინო დეპარტამენტის ხელმძღვანელ სკოტ ბესენტის თავდაპირველ წინადადებაზე.

Starlink რუსეთთან ომში მყოფ ქვეყანასა და მის არმიას საკვანძო მნიშვნელობის ინტერნეტკავშირს ანიჭებს, რომლის გარეშეც უკრაინას ძალიან გაუჭირდება. საკითხი ხელახლა წამოიჭრა 20 თებერვალს, ზელენსკისა და უკრაინაში დონალდ ტრამპის სპეციალურ წარმომადგენელ კიტ კელოგის შეხვედრისას. შეხვედრაზე, წყაროს ცნობით, ზელენსკის განუცხადეს, რომ გარდაუვალი იქნება სისტემის გათიშვა, თუ იშვიათი მინერალების საკითხზე შეთანხმების მიღწევა ვერ მოხერხდება.

ინფორმაციისთვის, თავდაპირველი შეთავაზება 500 მილიარდი დოლარის ღირებულების იშვიათი მინერალების მოპოვებაზე ნებართვასთან დაკავშირებით, ვოლოდიმირ ზელენსკიმ უარყო იმ მიზეზით, რომ ხელშეკრულება არ შეიცავდა უსაფრთხოების გარანტიებს უკრაინისთვის.