"რჩები პარლამენტში?!— ხარ ბიძინას რუსული პროექტი!", — წერს სოციალურ ქსელში კოალიცია ძლიერი საქართველოს ლიდერი, მამუკა ხაზარაძე.

შეგახსენებთ, რომ 5 თებერვალს, ოცნების პარლამენტმა სამი პოლიტიკური გაერთიანების 49 ოპოზიციონერ დეპუტატს უფლებამოსილების ვადა შეუწყვიტა. რის შემდეგაც — 150-წევრიანი პარლამენტი 101-წევრიანი გახდა. ეს ის პოლიტიკური გაერთიანებებია, რომელთაც 26 ოქტომბრის საპარლამენტო არჩევნებში ბარიერი გადალახეს, მაგრამ არჩევნების შედეგები არ აღიარეს და სადეპუტატო მანდატების შეწყვეტა მოითხოვეს. ოცნების პარლამენტისთვის მანდატების გაუქმების მოთხოვნით არ მიუმართავს მხოლოდ გიორგი გახარიას პარტია გახარიას საქართველოსთვის.

ოცნების პრემიერის, ირაკლი კობახიძის თქმით, პარლამენტში არ არის არცერთი "ნაცის" ადგილი, თუმცა, 12 "ნაცი" რჩება პარლამენტში.

"ვფიქრობ, რომ პარლამენტში არ არის არცერთი "ნაცის" ადგილი, თუმცა, 12 "ნაცი" რჩება პარლამენტში. ვნახოთ, რეალურად ჩვენს ხელში არ არის ეს გადაწყვეტილება. მოგეხსენებათ, რომ გიორგი გახარიას პარტიას არ დაუწერია განცხადება საპარლამენტო მანდატების შეწყვეტის თაობაზე, დაველოდებით მოვლენების განვითარებას. თუ შემოიტანენ განცხადებას მყისიერად შეუწყდებათ მანდატები, თუ გააცდენენ სესიის სხდომების ნახევარზე მეტს, აქაც მიღებული იქნება შესაბამისი გადაწყვეტილება", — განაცხადა ირაკლი კობახიძემ.

იმავე დღეს, პარტია გახარია საქართველოს არაოფიციალურ გვერდებზე ბანერი გამოჩნდა, სადაც ეწერა: "49 ნაცი პარლამენტიდან გაძევებულია; დარჩენილია 89 ნაცი".

აღნიშნულ ბანერს კოალიცია ძლიერი საქართველოს ლიდერი მამუკა ხაზარაძე დღეს დილით გამოეხმაურა.

"გახარიას პარტიის გავრცელებული დღევანდელი ბანერი პირდაპირი კოპირებაა "ოცნების" ცილისმწამებლური პროპაგანდის, რომელსაც დიდი ხანია აწარმოებს ჩემი და "ლელოს" წინააღმდეგ.

მაინც ვიმედოვნებდი, რომ ამ გაუგებრობას ახსნა-განმარტებას მოუძებნიდით, ან ბოდიშს მაინც შემოგვითვლიდით... ახლა ვრწმუნდები, რომ შეგნებულად დაგვესხით თავს, თუ ასე არაა, გვითხარით, რომ ვცდები და ახსენით!" — დაწერა მამუკა ხაზარაძემ.