აზერბაიჯანმა შეერთებული შტატების საერთაშორისო განვითარების სააგენტოსთან (USAID) 25-წლიანი თანამშრომლობა შეაჩერა. ამის შესახებ, 16 იანვარს, ბაქოში აზერბაიჯანის საგარეო საქმეთა მინისტრმა, ჯეიჰუნ ბაირამოვმა "ოცნების" ხელისუფლების საგარეო საქმეთა მინისტრ მაკა ბოჭორიშვილთან შეხვედრის შემდეგ გამართულ პრესკონფერენციაზე თქვა.

როგორც Sovanews წერს, ერთ-ერთმა ჟურნალისტმა ბაირამოვს ჰკითხა USAID-ის საქმიანობის შესახებ, რაზეც ბაირამოვმა უპასუხა, რომ შეერთებულმა შტატებმა აზერბაიჯანი 907-ე პუნქტით 2023 წელს "სუვერენიტეტის აღდგენისთვის" "დასაჯა". მინისტრი გულისხმობდა აზერბაიჯანზე შეტევას, რაც მთიანი ყარაბაღის საბოლოო კაპიტულაციით დასრულდა

აზერბაიჯანმა USAID-ის კრიტიკა 2023 წლის ბოლოს მას შემდეგ დაიწყო, რაც სააგენტოს ხელმძღვანელმა სამანტა პაუერმა თქვა, რომ აზერბაიჯანის "სეპარატისტული რეგიონის, მთიანი ყარაბაღის დასაბრუნებლად განხორციელებულმა სამხედრო ოპერაციამ 100 000-ზე მეტი ადამიანი აიძულა, დაეტოვებინა სახლები და მეზობელ სომხეთში გადასულიყო და აშშ აგრძელებს [მთიანი ყარაბაღის] ეთნიკური სომხების მხარდაჭერას".

ხუთშაბათს გამართულ პრესკონფერენციაზე ბაირამოვმა განაცხადა, რომ 2024 წლის ივლისიდან USAID-ის საქმიანობა აზერბაიჯანში დე იურე შეუძლებელია. მან დასძინა, რომ აზერბაიჯანი-USAID-ის ჩარჩო დოკუმენტი 2000 წლიდან არსებობს.

"ჩვენ გავაანალიზეთ ამ დოკუმენტის დებულებები და როგორ განხორციელდა ის ბოლო წლების განმავლობაში. აღმოჩნდა, რომ მათი საქმიანობა არ შეესაბამება აზერბაიჯანის სურვილებისა და ინტერესების ფორმატს, მაგრამ ემსახურება აშშ-ის დღის წესრიგის განხორციელებას აზერბაიჯანში. ამასთან დაკავშირებით, ჩვენ გავაგზავნეთ შეტყობინება ამ ხელშეკრულების დებულებების შესაბამისად და განვაცხადეთ, რომ არ ვართ დაინტერესებული ამ პირობებით ხელშეკრულების გაგრძელებით", — განაცხადა ბაირამოვმა.

მისი თქმით, შეთანხმებას ვადა 2024 წლის თებერვალში ეწურებოდა და დროა, შეჩერდეს USAID-ის საქმიანობა.

"მოლაპარაკებების დროს დავინახეთ, რომ შეერთებულმა შტატებმა არ გაითვალისწინა აზერბაიჯანის ინტერესები და ცდილობდა საკუთარი ინტერესების კარნახით ემოქმედა. არ არის იმის აუცილებლობა, რომ USAID-ის წარმომადგენლობა და საქმიანობა აზერბაიჯანში მთლიანად შეჩერდეს", — თქვა მინისტრმა.

USAID, თავის მხრივ, აზერბაიჯანთან განვითარების თანამშრომლობის სტრატეგიას აღწერს, როგორც "გაძლიერებულ, მდგრად პარტნიორობას, რომელიც ხელს უწყობს ქვეყნის განვითარებას".

1991 წლიდან USAID-მა 450 მილიონ დოლარზე მეტი ინვესტიცია განახორციელა აზერბაიჯანელების მხარდაჭერის პროგრამებში, მათ შორის ჰუმანიტარულ დახმარებაში, ჯანდაცვაში, ეკონომიკურ რეფორმასა და მმართველობაში. გარდა ამისა, აზერბაიჯანის მთავრობამ გამოყო 20 მილიონ დოლარზე მეტი დამატებითი სახსრები USAID-ისთვის, რათა დაეხმაროს ქვეყნის ეკონომიკური რეფორმის მიზნების მიღწევას.