ცნობილი ესპანელი კინოსა და თეატრის მსახიობი მარისა პარედესი 78 წლის ასაკში გარდაიცვალა. ინფორმაციას ამის შესახებ ესპანეთის კინოხელოვნების აკადემია ავრცელებს, რომელსაც პარედესი 2000 წლიდან 2003 წლამდე ხელმძღვანელობდა.

პარედესი ყველაზე მეტად ესპანელ კინორეჟისორ პედრო ალმოდოვართან მრავალწლიანი თანამშრომლობითაა ცნობილი. მსახიობმა ალმოდოვარის არაერთ ფილმში ითამაშა, მათ შორისაა მაღალი ქუსლები, ყველაფერი დედაჩემის შესახებ და ჩემი საიდუმლოს ყვავილი (ამ უკანასკნელმა მას ესპანეთის მთავარი კინოპრემიის, გოიას ჯილდოს, ნომინაცია მოუტანა).

მარისა პარედესის დებიუტი კინოში 1960 წელს შედგა, როცა იგი მხოლოდ 14 წლის იყო. ხანგრძლივი კარიერის განმავლობაში მსახიობმა 70-ზე მეტ ფილმსა თუ ტელესერიალში ითამაშა. მიიჩნევა, რომ ალმოდოვარი მას საერთაშორისო აღიარების მოპოვებაში დაეხმარა. პარედესმა მოგვიანებით ისეთ ცნობილ ფილმებშიც მიიღო მონაწილეობა, როგორებიცაა რობერტო ბენინის ცხოვრება მშვენიერია და გილერმო დელ ტოროს ეშმაკის ხერხემალი.

1996 წელს პარედესი ესპანეთის კულტურის სამინისტრომ ეროვნული კინოპრემიით დააჯილდოვა. 2018 წელს მსახიობს გოიას საპატიო ჯილდოც გადაეცა.

აღსანიშნავია, რომ შემოდგომაზე პარედესი საქართველოსაც ეწვია ქუთაისის მოკლემეტრაჟიანი ფილმების საერთაშორისო ფესტივალის ფარგლებში.