ბორჯომში, წაღვერის ტყეში, სოფელ დაბასთან ხანძრის ლოკალიზება ისევ ვერ ხერხდება. ამის შესახებ On.ge-სთან საგანგებო სიტუაციების მართვის სამსახურის პრესსამსახურის თანამშრომელი საუბრობს.

როგორც ის ამბობს, ამ ეტაპზე, ტყის რელიეფიდან გამომდინარე, შეუძლებელია იმის თქმა ხანძარი რამხელა ფართობზეა გავრცელებული. მისივე თქმით, ხანძარსაწინააღმდეგო სამუშაოებში დილიდანვე ჩართულია ავიაცია და 200-მდე მეხანძრე მუშაობს.

"ვვარაუდობთ, რომ ერთობლივი ძალებით ხანძრის ჩაქრობას უახლოეს საათებში შევძლებთ", - ამბობენ საგანგებო სიტუაციების მართვის სამსახურის პრესსამსახურში, სადაც დასძენენ, რომ ღამით სახანძრო ავტომობილებისთვის გზა გაიჭრა და მათი ხანძრამდე მიყვანა გახდა შესაძლებელი.

ტყეში ხანძარი 20 აგვისტოს, შუადღისას გაჩნდა. ქარიანი ამინდის გამო ცეცხლი ტერიტორიაზე სწრაფად გავრცელდა. ეროვნული სატყეო სააგენტოს განცხადებით, ხანძრის გაჩენის სავარაუდო მიზეზად მაღალი ტემპერატურა და მოსახლეობის დაუდევრობა სახელდება.