რუსული სამთავრობო-პროპაგანდისტული ტელევიზიები Google-ისგან მათი არხების YouTube-ზე დაბლოკვის გამო თანხას ითხოვენ, რომელიც იზრდება და ამ ეტაპზე, ჯამში, 2 სექსტილიონ რუბლს შეადგენს. სექსტილიონში 21 ნულია.

28 ოქტომბრის სასამართლო სხდომაზე მოსამართლემ განაცხადა, რომ იგი განიხილავს საქმეს "ძალიან, ძალიან ბევრი ნულით".

რუსული სასამართლოს მხრიდან Google-ისთვის ჯარიმების დაკისრება გამომდინარეობს იქიდან, რომ კომპანიამ სასამართლოს მოთხოვნა არ დააკმაყოფილა, რომ აღედგინა რუსული პროპაგანდისტული ტელევიზიების არხები YouTube-ზე, მათ შორის, Первый канал, ВГТРК, НТВ, რუსეთის თავდაცვის სამინისტროს არხი Звезда და კრემლის პროპაგანდისტი მარგარიტა სიმონიანის პირადი YouTube-არხი - ИП Симоньян М.С.

ამასთან, თუ კომპანია უარს იტყვის აღნიშნული თანხების გადახდაზე, უმოქმედობის ყოველი დღისთვის 100-100 ათასი რუბლის გადახდა დაეკისრება და ყოველ კვირას გაორმაგდება იქამდე, სანამ კომპანია თანხას არ გადაიხდის.

პროგრესული ჯარიმის რაოდენობა შეზღუდული არ არის.