აუდიტორია 115-ის მტკიცებით, პარლამენტმა უმაღლესი განათლების შესახებ კანონში ცვლილებების შესატანი კანონპროექტის განხილვა შეაჩერა და ამ გზით სტუდენტები დასაჯა მათი აქტივიზმის გამო. ამის შესახებ მოძრაობის წევრმა, გიორგი არობელიძემ, დღეს, 14 ივნისს გამართულ პრესკონფერენციაზე განაცხადა.

არობელიძის თქმით, 13 ივნისს, განათლების საპარლამენტო კომიტეტის თავმჯდომარეს, მარიამ ჯაშსა და სხვადასხვა ორგანიზაციებს შორის გამართულ შეხვედრაზე, ერთ-ერთმა მონაწილემ წამოჭრა საკითხი აღნიშნულ კანონპროექტთან დაკავშირებით. მისივე თქმით, მარიამ ჯაშმა პირდაპირ თქვა, რომ კანონპროექტი არ გავა და აუდიტორია 115 ამით დაისჯება იმის გამო, რომ სხვადასხვა მხრივ აქტიურობდა.

"მარიამ ჯაშმა ფილარმონიაში, კონსტიტუციის პროექტის განხილვის ჩაშლაზე გაამახვილა ყურადღება და თქვა, რომ ამის შემდეგ მის კოლეგებში ვერ ნახავს ვერც ერთ თანამონაწილეს, რომელიც ამ კანონპროექტს განიხილავს," - ყვება On.ge-სთან პაატა ნინუა, რომელიც შეხვედრას ესწრებოდა.

On.ge დაუკავშირდა მარიამ ჯაშს, რომელმაც განაცხადა, რომ აღნიშნულ საკითხზე თავის პოზიციას დღეს ჩანიშნულ პრესკონფერენციაზე გააჟღერებს.

რამდენიმე თვიანი პროტესტის შემდეგ, აუდიტორია 115-ის მოთხოვნები დაკმაყოფილდა. 7 მარტს, მარიამ ჯაშმა განაცხადა, რომ განათლების საკითხების კომიტეტმა უმაღლესი განათლების შესახებ კანონში ცვლილებების შესატან კანონპროექტზე მუშაობა დაასრულა. კანონპროექტი სრულად ითვალისწინებს სტუდენტების მოთხოვნებს გარდა იმისა, რომ სტუდენტური თვითმმართველობა არ გაუქმდება და თითოეულ უნივერსიტეტში დარჩება სტუდენტების წარმომადგენლობის ერთი ორგანიზაცია, თუმცა ის უნივერსიტეტის დონეზე, სტუდენტების მიერ დარეგულირდება.