პოლონელი ფუმფულა ფისო, სახელად გაცეკი, ქვეყნის "ღირსშესანიშნაობად" იქცა და Google Maps-ის შეფასებებით 5 ვარსკვლავიც მოიპოვა. ფისოს მოსანახულებლად ტურისტები ხშირად მიდიან, რადგან მას გამვლელებთან თამაში უყვარს და ამაში მაღალ შეფასებებსაც იღებს.

ფუმფულა ფისომ Google Maps-ის შეფასებებით ქალაქ შჩეცინის რამდენიმე ღირსშესანიშნაობას უკვე გადაუსწრო. წლებია, იმ ქუჩაზე, რომელზეც ფისო ცხოვრობს, უამრავი ტურისტი დადის და გაცეკს გემრიელობებს უტოვებს. ფისოს კი კამერების წინ პოზირება სულაც არ ღლის.

თავდაპირველად ფისომ ყურადღება მაშინ მიიქცია, როცა 2020 წელს იუთუბზე ერთ-ერთ დოკუმენტურ ფილმში გამოჩნდა. ადგილობრივი მედიის ცნობით, ამ ფილმში გამოჩენის შემდეგ ფუმფულა ფისოს სანახავად ტურისტები გერმანიიდანაც კი ჩამოვიდნენ. იუთუბზე უამრავი ადამიანი წერდა, რომ ფისოს სანახავად და მასთან სათამაშოდ აუცილებლად წავიდოდა, რაც მართლაც ასე მოხდა.

მართალია, ფუმფულა ფისო ყველას ძალიან უყვარს, მაგრამ Google Maps-ის შეფასებებში გამონაკლისებიც გამოჩნდნენ. 2022 წელს ერთმა მომხმარებელმა ფისოს ერთი ვარსკვლავი დაუწერა, მიზეზად კი ის დაასახელა, რომ "მან ძეხვი მოჰპარა".