საქართველოს მთავრობა მოსახლეობას მოუწოდებს, შეუერთდეს აქციას - გაახარე შენი ბზა. პრემიერმინისტრმა გიორგი კვირიკაშვილმა საქართველოს მოსახლეობას წითელი ნუსხით დაცული კოლხური ბზის მოჭრისგან თავის შეკავებისკენ მოუწოდა.

„მოსახლეობას ვთხოვ, რომ თავი შეიკავონ ბზის გაჩეხვისგან და უკვე მოჭრილი ბზის ტოტები გამოვიყენოთ იმისთვის, რომ, პირიქით, გავამრავლოთ ეს ულამაზესი მცენარე. გასული წლების ისტორიით თუ ვიმსჯელებთ, უმოწყალოდ ხდება ამ მცენარის განადგურება, რაც არ უნდა დავუშვათ. კარგია, რომ ამ მიმართულებით მიმდინარეობს საინფორმაციო კამპანია და დიდი იმედი მაქვს, რომ ჩვენი მოქალაქეები გაითვალისწინებენ ამ მნიშვნელოვან თხოვნას. დღესასწაული კარგია, ჩვენ ყველანი ერთად ვზეიმობთ, თუმცა მცენარესაც უნდა გავუფრთხილდეთ“ - განაცხადა პრემიერმა მთავრობის სხდომაზე.

კვირიკაშვილი მოქალაქეებს მიმართავს, უკვე მოჭრილი ბზის ტოტები მის გასამრავლებლად გამოიყენონ.