ბარსელონას დირექტორთა საბჭომ გუნდის ქართული ფან-კლუბი ოფიციალურად ცნო. ამ ინფორმაციას საფეხბურთო კლუბ ბარსელონას ოფიციალური საიტი ავრცელებს.

ქართული ოფიციალური ფან-კლუბი Penya Blaugrana Tbilisi-ის სახელს ატარებს და ის ბარსელონას დირექტორთა საბჭომ 6 თებერვალს დაამტკიცა.

ჩვენ ამ საკითხზე ბარსელონას ქართული ფან-კლუბის ერთ-ერთ დამფუძნებელს, მიხელ ზაქარეიშვილს გავესაუბრეთ. მისი თქმით, ოფიციალური სტატუსის მისაღებად სამუშაოები წელიწად-ნახევრის წინ დაიწყო, როდესაც ესპანური გრანდი თბილისში იყო ჩამოსული.

"პროცედურები დავიწყეთ წელიწად-ნახევრის წინ, 2015 წლის აგვისტოში, როდესაც ბარსელონა იყო ჩამოსული. მათმა ერთ-ერთმა წარმომადგენელმა თავად გამოთქვა სურვილი, რომ თბილისში გახსნილიყო ოფიციალური Penya (მხარდამჭერთა კლუბი). ამაზე მანამდეც ვფიქრობდით, მაგრამ მასთან საუბრის შემდეგ, მივხვდით, რომ რეალური იყო ჩვენი ჩანაფიქრი“, - ამბობს მიხეილ ზაქარეიშვილი, ქართული ფან-კლუბის დამფუძნებელი.

ოფიციალური ფან-კლუბის წოდების მოსაპოვებლად ბარსელონას თავისი მოთხოვნები ჰქონდა, რომელთა დაკმაყოფილებასაც დრო და შრომა დასჭირდა.

"კლუბი ითხოვდა შემდეგს: მხარდამჭერთა კლუბის პრეზიდენტი უნდა ყოფილიყო ბარსელონას კლუბის წევრი. მხარდამჭერთა კლუბის ადგილმდებარეობა, სამართლებრივი ფორმა, წესდება, სახელი და ლოგო უნდა შეთანხმებულიყო ბარსელონასთან. მხარდამჭერთა კლუბში გაწევრიანებული უნდა ყოფილიყო მინიმუმ 75 ადამიანი“, - ამბობს მიხეილ ზაქარეიშვილი.

როგორც აღმოჩნდა, ოფიციალური ფან-კლუბის დაარსებაში ბარსელონას წარმომადგენლების წვლილი საკმაოდ დიდი იყო.

"ზოგადად, ბარსელონას საზომით, თბილისი ძალიან დიდი ქალაქია. ამიტომ, თავად იყვნენ დაინტერესებულნი, რომ აქ მხარდამჭერთა კლუბი ყოფილიყო. სევილიასთან თამაშის შემდეგ ნახეს, რომ ძალიან ბევრი გულშემატკივარი ჰყავს აქ ბარსას, ამიტომ, თავად მოინდომეს და წელიწად-ნახევრის განმავლობაში ბევრ რამეში გვეხმარებოდნენ“, - ამბობს ფანკლუბის ერთ-ერთი დამფუძნებელი.

ბარსელონას ოფიციალური ფან-კლუბის საინფორმაციო პარტნიორი ვებსაიტი Barcamania.ge იქნება, ხოლო თავად ფან-კლუბს ახალი საიტი ექნება, რომელზეც მუშაობა უკვე დაწყებულია.

ქართულ ფან-კლუბთან ერთად ბარსამ კიდევ 14 ქვეყნის ფან-კლუბი დაამტკიცა..