17 ნოემბერს მუზეუმ "ქარვასლაში" თიბისი ბანკისა და ჯეოსელის ერთობლივი პროექტის, "ბიზნესდაჯილდოება 2016" ღონისძიება გაიმართა. პროექტის მიზანია ქვეყანაში ბიზნესისა და დამწყები მეწარმეების, ასევე მცირე და საშუალო ბიზნესის წახალისება.

პროექტი, რომელიც 20 ივნისს დაიწყო, რამდენიმე ეტაპისგან შედგებოდა: სასურველ ნომინაციაში განსახილველად თავდაპირველად 523 კომპანია დარეგისტრირდა; კვალიფიციური ექსპერტებისაგან შემდგარმა დამოუკიდებელმა კომისიამ განაცხადები შეისწავლა და თითოეულ ნომინაციაში 3-3 ფინალისტი გამოავლინა. გამონაკლისი იყო ნომინაცია "ხალხის რჩეული", სადაც გამარჯვებული 1-დან 17 ნოემბრის ჩათვლით ხმის მიცემით უნდა გამოვლენილიყო. ნებისმიერ მოქალაქეს შეეძლო 24 საათში ერთხელ მხარი დაეჭირა სასურველი კომპანიისათვის.

თიბისი ბანკი და ჯეოსელი საკუთარი რესურსებით ეხმარებოდნენ მონაწილე კომპანიებს სხვადასხვა აქტივობის განხორციელებაში. შედეგად, სოციალური ქსელის მეშვეობით "ბიზნესდაჯილდოების" შესახებ მილიონზე მეტმა ადამიანმა შეიტყო, ხოლო ჰეშთეგი #გააზიარეწარმატება 90 000-მდე მომხმარებლის პირად გვერდზე მოხვდა. მონაწილე კომპანიების შესახებ მთელი ამ დროის განმავლობაში 200-ზე მეტი სტატია და რეპორტაჟი მომზადდა.

დამოუკიდებელმა კომისიამ გამარჯვებულები შემდეგ ნომინაციებში გამოავლინა:

წლის მცირე ბიზნესი: White Studio

წლის მცირე ბიზნესის ნომინაციაში სამი ფინალისტიდან გამარჯვებული "WHITE STUDIO" გახდა. კომპანია თანამედროვე ქართულ კერამიკულ ნამუშევრებს აწარმოებს. აღსანიშნავია, რომ აქ შეძენილი ნებისმიერი ნივთი ექსკლუზიურია და არ მეორდება. კომპანია განსაკუთრებულ მნიშვნელობას ანიჭებს ქართული ტრადიციული ელემენტების შერწყმას თანამედროვე ფორმასთან.

წლის ინოვაციური ბიზნესი: ბიოქიმფარმი

ISO სერტიფიცირებული ბიოფარმაცევტული კომპანია "ბიოქიმფარმი" წლის ონოვაციურ ბიზნესად დასახელდა. ამ ნომინაციაში გამარჯვებულ კომპანიას განსაკუთრებული პრიზი - ლისაბონში ინოვაციების სამიტზე დასწრება - გადაეცა.

წლის ტურისტული ბიზნესი: რესტორანი ბარბარესთან

რესტორანი "ბარბარესთან" წლის ტურისტული ბიზნესი გახდა. ბიზნესს დედა, მამა და მათი 10 შვილი უძღვება. რესტორანი ბარბარე ჯორჯაძის უნიკალური რეცეპტების მიხედვით ძველ ქართულ კერძებს აცოცხლებს.

წლის ქართული პროდუქტი: ბადაგი

კომპანია "ბადაგი", რომელიც თავიდან მხოლოდ 1 ადამიანის ჩურჩხელებს ყიდდა, ამჟამად 10 სახეობის 4000-მდე ჩურჩხელას აწარმოებს. წლის ქართული პროდუქტის ტიტულიც სწორედ ამ კომპანიას გადაეცა.

წლის აგრობიზნესი: ბი-პი-სი

ბი-პი-სის მიერ დამზადებული გემრიელი წვენები ოჯახური ბიზნესია. დღეს კომპანია, რომელიც წლის აგრობიზნესად დასახელდა, ქართული წვენების ფართო არჩევანს გვთავაზობს.

ხალხის რჩეული: კინგსი საქართველო

ამ ნომინაციაში მონაწილე კომპანიები ხმის მიცემის მარათონში იყვნენ ჩართულნი. ხალხის რჩეული "კინგსი საქართველო" გახდა, რომელმაც 16555 ხმა დააგროვა.

წლის ბიზნესი: ბანაკი ზეთა

ტურისტული კომპანია "ბანაკი ზეთა" წლის ბიზნესად დასახელდა. ბანაკი ყაზბეგის რაიონის სოფელ ჯუთაში, ზღვის დონიდან 2300 მეტრზე მდებარეობს. კომპანიის მიზანია მოსახლეობისაგან თითქმის დაცლილი სასაზღვრე სოფლის ტურისტულ ადგილად ქცევა.

თიბისი ბანკისა და ჯეოსელის ერთობლივი ბიზნესდაჯილდოება მომავალ წელსაც გაიმართება და ორგანიზატორები ბევრ სიახლეს გვპირდებიან.