25 ივნისს, 500 Global in Eurasia-ს სტარტაპ აქსელერაციის პროგრამის მეათე ნაკადის დასკვნითი ღონისძიება — დემო დღე გაიმართა. პროგრამა საქართველოს ბანკისა და საქართველოს ინოვაციებისა და ტექნოლოგიების სააგენტოს (GITA) მხარდაჭერით ხორციელდება. ის ადრეული ეტაპის ტექნოლოგიური სტარტაპების განვითარებას, მათ გაძლიერებასა და საერთაშორისო ბაზრებზე გასვლას უწყობს ხელს.

მეათე ნაკადის მონაწილეები იყვნენ: Cerberus, Clinova, ComplyBridge Inc., MaiCall, Mybots, Resti, Whisperr, Evermuse, Karpatia Benefits.

დემო დღის ფარგლებში პროგრამის მონაწილე სტარტაპებმა ინვესტორებს, კორპორაციული სექტორის წარმომადგენლებსა და ინდუსტრიის ექსპერტებს საკუთარი ბიზნეს-იდეები, მიღწეული პროგრესი და სამომავლო განვითარების ხედვა წარუდგინეს. ღონისძიება მონაწილეებისთვის მნიშვნელოვანი შესაძლებლობა იყო, პოტენციურ ინვესტორებთან და პარტნიორებთან პირდაპირი კომუნიკაცია დაემყარებინათ, მიეღოთ პროფესიონალური უკუკავშირი და გაეფართოებინათ საერთაშორისო სანაცნობო ქსელი.

500 Global in Eurasia-ს 12-კვირიანი აქსელერაციის პროგრამის ფარგლებში სტარტაპებმა იმუშავეს საერთაშორისო გამოცდილების მქონე მენტორებთან, გაიარეს ინტენსიური სასწავლო მოდულები, მიიღეს პრაქტიკული ცოდნა და დახვეწეს საკუთარი ბიზნესმოდელები, რათა უფრო კონკურენტუნარიანები გამხდარიყვნენ, როგორც ადგილობრივ, ისე გლობალურ ბაზრებზე.

ინფორმაციისთვის, 2022 წელს 500 Global-მა, საქართველოს ბანკთან და GITA-სთან ოთხწლიანი პარტნიორობის ხელშეკრულება გააფორმა, რომლის ფარგლებშიც, 500 Global in Eurasia-ს აქსელერაციის პროგრამა საქართველოში, თბილისში წელიწადში ორჯერ იმართება.

500 Global-ის შესახებ:

500 Global გლობალური ვენჩურული საინვესტიციო კომპანიაა, რომელიც, 2023 წლის 31 დეკემბრის მონაცემებით, 2.4 მილიარდი დოლარის აქტივებს მართავს. იგი ინვესტიციას ახორციელებს სტარტაპებში, რომლებიც ქმნიან სწრაფად მზარდ ტექნოლოგიურ კომპანიებს. 500 Global მჭიდროდ თანამშრომლობს ეკოსისტემის მთავარ მონაწილეებთან და კონსულტაციას უწევს მთავრობებს, შექმნან ისეთი სამეწარმეო ეკოსისტემა, რომელშიც სტარტაპებს ექნება სწრაფი განვითარების შესაძლებლობა. დღემდე 500 Global-მა მხარი დაუჭირა 5000-ზე მეტ დამფუძნებელს და 2900-ზე მეტ კომპანიას, 80+ ქვეყნიდან. მისი პორტფოლიო მოიცავს 35-ზე მეტ კომპანიას, რომელთა ღირებულება 1 მილიარდ დოლარზე მეტია, და 160+ კომპანიას, რომელთა ღირებულება 100 მილიონ დოლარს აღემატება (მათ შორის არის კერძო, საჯარო და exited კომპანიები). 500 Global-ის გუნდი 20-ზე მეტ ქვეყანაშია განთავსებული. გუნდის წევრებს მეწარმეობისა და ინვესტირების გამოცდილება აქვთ, გარდა ამისა, მუშაობდნენ წამყვან ტექნოლოგიურ კომპანიებში.