რობერტ პატინსონთან ერთად New York Times-ის პოდკასტში სტუმრობისას, ზენდეიამ ტომ ჰოლანდთან ურთიერთობაზე ისაუბრა. მსახიობის თქმით, ტომი "მისი ადამიანია".

"მივხვდი, რომ ტომი ჩემი ადამიანია, რადგან მის გვერდით არაფერზე ვნერვიულობ," — ამბობს მსახიობი — "როცა მისგან შორს ვარ, უფრო ვღელავ, ვიდრე მაშინ, როცა მასთან ახლოს ვარ".

ზენდეიამ ტომთან პირველ შეხვედრაზეც ისაუბრა. მსახიობის თქმით, ის ადამიანი ობობას კასტინგზე ძალიან ღელავდა, ხოლო ტომმა მას თავი კომფორტულად აგრძნობინა. "ის ძალიან საყვარელი იყო", — ამბობს ზენდეია.

მსახიობის თქმით, კარგად ესმის, რომ საზოგადოება მისი პირადი ცხოვრებით დაინტერესებულია. "ეს ნამდვილად მესმის და არ მინდა, ისეთი დამოკიდებულება მქონდეს, თითქოს ვამბობდე 'ჩემს საქმეებში ნუ ერევით', მაგრამ ამავდროულად, პირად სივრცეს ძალიან ვუფრთხილდები და მაქსიმალურად ვცდილობ, გარკვეული დეტალები მხოლოდ ჩემთვის და ტომისთვის დავიტოვო".

გავრცელებული ინფორმაციით, ზენდეია და ტომ ჰოლანდი გასულ თვეს დაქორწინდნენ. ქორწინების ამბავი კი Actor Award-ზე ზენდეიას სტილისტმა, ლა როუჩმა, გვამცნო. მისი თქმით, წყვილს ქორწილი უკვე ჰქონდათ.

ფოტო: Getty Images

ტომი და ზენდეია ერთმანეთს ადამიანი ობობას გადაღებაზე, 2016 წელს შეხვდნენ, ხოლო ურთიერთობა 2021 წელს გაასაჯაროვეს. მათი ნიშნობის ამბავი კი გასულ წელს გავრცელდა, როცა ზენდეია ოქროს გლობუსის დაჯილდოების ცერემონიაზე ნიშნობის ბეჭდით გამოჩნდა.

რაც შეეხება მსახიობების კარიერას, წყვილს Spider-Man: Brand New Day-ში 2026 წლის 31 ივლისს ვიხილავთ, ხოლო მანამდე ზენდეიასა და ტომ ჰოლანდის ნახვას კრისტოფერ ნოლანის ახალ მძაფრსიუჟეტიან ფილმში, ოდისეაში, შევძლებთ, რომლის პრემიერის თარიღი 2026 წლის 17 ივლისია.

თუ ტომსა და ზენდეიას თვალს ადევნებთ, აუცილებლად ნახეთ: