გერმანიის კანცლერი, ოლაფ შოლცი კიევში ჩავიდა. ინფორმაციას DW ავრცელებს. ეს მისი პირველი ვიზიტია 2022 წლის ივნისის შემდეგ, როდესაც ის კიევს საფრანგეთის პრეზიდენტ, ემანუელ მაკრონთან და იტალიის იმჟამინდელ პრემიერ-მინისტრთან, მარიო დრაგისთან ერთად ეწვია.
გერმანიის კანცლერი უკრაინის პრეზიდენტს, ვოლოდიმირ ზელენსკის შეხვდება. საუბრის მთავარი თემა იქნება ოლაფ შოლცის რუსეთის პრეზიდენტ, ვლადიმერ პუტინთან სატელეფონო საუბარი, რის გამოც უკრაინისგან კრიტიკა დაიმსახურა. გერმანული მედიის ინფორმაციით, ოლაფ შოლცი კიდევ ერთხელ დაადასტურებს გერმანიის ურყევ მხარდაჭერას უკრაინისადმი.

მიუხედავად ოლაფ შოლცის ფრთხილი პოლიტიკისა, რის გამოც ოპოზიცია მას ხშირად აკრიტიკებდა, მისი მეთაურობის პერიოდში გერმანია, აშშ-ის შემდეგ, უკრაინის ყველაზე დიდი სამხედრო დონორი გახდა.

გუშინ უკრაინაში ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში, კაია კალასი, ევროკომისარი გაფართოების საკითხებში, მარტა კოსი და ევროპული საბჭოს პრეზიდენტი, ანტონიო კოშტა იმყოფებოდნენ.