თუ დღეს ინტერნეტის ან ტელევიზიისთვის თვალი არ მიგიდევნებია, კახი კალაძის მიერ პომპეზურად გახსნილი თემქის პარკის დატბორვის ტრაგიკომედიური კადრები შესაძლოა გამოგრჩენოდა.

მიუხედავად იმისა, რომ ამ პროექტის ბრწყინვალებასა და ევროპულ სტანდარტებთან შესაბამისობაზე გაუთავებლად გვესმოდა და ველოდით, რომ ეს უდიდესი რეკრეაციული ზონა თბილისის მერის მაგნუმ ოპუსი იქნებოდა, გახსნიდან 2 დღეში პარკი გაუმართავი საირიგაციო სისტემის გამო დაიტბორა.

ეს პირველი შემთხვევა არ არის, როცა "ოცნების" მიერ მილიონებად შეფასებული პროექტები პირდაპირი და გადატანითი მნიშვნელობით თავზე დაგვემხო. წარმოგიდგენთ 5 რამეს, რაც დადასტურებულად უფრო დიდ ხანს ძლებს უნაკლოდ, ვიდრე მმართველი პარტიის მიერ აშენებული პროექტები.

1. თემქის ცენტრალური პარკი vs ხაჭო

თემქის პარკი გახსნიდან სულ რაღაც 2 დღეში დაიტბორა. მასზე დიდი გამძლეობა ისეთ მალფუჭებად პროდუქტსაც აქვს, როგორიცაა ხაჭო ან ნებისმიერი რძის ნაწარმი.

2. წერეთლის გამზირი vs კონსერვირებული სიმინდი

წერეთლის გამზირი, რომლის რენოვაციაც $36.6 მილიონი დაჯდა და რომლის გახსნაც დროულად ვერ მოხერხდა, სამუშაოების დასრულებიდან 6 თვეში დაიტბორა. კონსერვირებულ სიმინდს ვადა დაახლოებით 2 წელში გასდის, რაც იმას ნიშნავს, რომ ამ პროდუქტის დაუზიანებლობის იმედი უფრო დიდი ხნის განმავლობაში შეგვიძლია გვქონდეს, ვიდრე წერეთლის გამზირის.

3. ვარკეთილის მეტრო vs შოკოლადი

ვარკეთილის მეტროში რეაბილიტაციიდან 4 თვეში ჭერი ჩამოინგრა. ეს შემთხვევა 2018 წელს მოხდა, რის შემდეგაც მეტროსადგურის ხელახალი რემონტი დაიწყო. დაგვეთანხმებით, რომ 4 თვე ძალიან მცირე დროა იმისთვის, რომ ჭერი თავი ჩამოგვენგრეს — ჩვეულებრივი შოკოლადიც კი უფრო დიდ ხანს ძლებს, ვიდრე “ოცნების” მიერ განახლებული მეტროსადგური.

4. ჭავჭავაძის გამზირი vs რძე

ჭავჭავაძის გამზირი, რომელიც უმნიშვნელოვანესი პროექტი იყო თბილისის მერიისთვის და რომლისთვისაც დედაქალაქის ბიუჯეტიდან 15 მილიონ ლარზე მეტი დაიხარჯა, არაერთხელ დაიტბორა. მაშინ, როცა რეაბილიტაციის პროექტი დასასრულს უახლოვდებოდა, წვიმის შედეგად მთელი გამზირი დაიტბორა და წყალი მიწისქვეშა გადასასვლელში დადგა. ფაქტობრივად, პროექტი გახსნამდე ჩავარდა. ასე სწრაფად მალფუჭებადი პროდუქტიც არ გვახსენდება, რომ შევადაროთ, ამიტომ, მოდით, ვთქვათ, რომ ჭავჭავაძის გამზირმა იმაზე ნაკლებ ხანს გაძლო, ვიდრე რძე ძლებს სათანადოდ შენახვის გარეშე.

5. რიკოთის გვირაბი vs წიწაკა

რიკოთზე მიმდინარე აღმოსავლეთ-დასავლეთის ჩქაროსნული მაგისტრალის მშენებლობა რამდენჯერმე გაჩერდა და ჩამოიშალა კიდეც. ეს მშენებლობა წიწაკას მოგვაგონებს, რომელიც ხალხს ამწარებს, ხანდახან კი ხმება და კედელზე ჩამოკიდებულია, ისე, რომ მისი არსებობაც გვავიწყდება.

ხუმრობა იქით იყოს და არჩევნები უკვე კარს მოგვადგა. 26 ოქტომბერს საქართველოს მომავალი წყდება — ან ევროპულ მომავალს ვირჩევთ ჩვენი ქვეყნისთვის, ან ვაგრძელებთ ისეთ რეჟიმში ცხოვრებას, რომელიც ჩვენი გადასახადებიდან არამიზნობრივად ხარჯავს თანხებს, იწყებს მშენებლობებს, რომლებიც რამდენიმე თვეში კვლავ შესაკეთებელია და ადამიანებისთვის სასიცოცხლო საფრთხეს წარმოადგენს.