უკვე ერთი წელი გავიდა მას შემდეგ, რაც მაილი საირუსმა სიმღერა Flowers გამოუშვა. Flowers მაშინვე პოპულარულ ჰიტად იქცა და მილიონობით ადამიანი აგვამღერა. სიმღერის 1 წლის იუბილეზე მაილიმ Flowers-ის შესახებ ინსტაგრამზე პოსტი გამოაქვეყნა.

"ერთი წლის წინ ამ დღეს Flowers-მა ადამიანების გაბედნიერება დაიწყო, ეს ფაქტი კი მე მაბედნიერებს. მიყვარხართ, მადლობა", — წერს მაილი ინსტაგრამზე და ფოტოებსა გვიზიარებს.

შეგახსენებთ, რომ Flowers-ის გამოსვლის თარიღი მაილი საირუსის ყოფილი ქმრის, ლიამ ჰემსვორტის, დაბადების დღეს დაემთხვა. ფანების აზრით, სიმღერის ტექსტიდან გამომდინარე, Flowers მაილისა და ლიამის ურთიერთობის შესახებაა.

///

"ჩვენ იმ ოცნების მსგავსად ვიყავით, რომელიც შეუფასებელია... ავაშენეთ სახლი და ვუყურეთ, როგორ დაიწვა", — ვკითხულობთ სიმღერის ტექსტში. ეს მონაკვეთი მომღერლის ფანებმა მაილისა და ლიამის თანაცხოვრებასა და 2018 წლის კალიფორნიის ხანძარს დაუკავშირეს, რის შედეგადაც მათი სახლი დაიწვა. ასევე ერთ-ერთმა გულშემატკივარმა Flowers-ის კლიპში მაილის ცეკვა იმ მოძრაობას მიამსგავსა, როცა წლების წინ საირუსი და ჰემსვორტი წითელ ხალიჩაზე ერთად გამოჩნდნენ და ინტერვიუს დროს მომღერალი აცეკვდა. ტვიტერზე ამ მოსაზრებას მაილის ბევრი ფანი დაეთანხმა.

Flowers-მა სხვადასხვა პლატფორმაზეც დიდ წარმატებას მიაღწია. სიმღერამ აშშ-ის Billboard-ის ჩარტების სათავეში 8 კვირა გაატარა, ხოლო Spotify-ის წინა წლის შეჯამების მიხედვით, 2023 წელს პლატფორმაზე Flowers-ს ყველაზე მეტჯერ მოუსმინეს.