ტეილორ სვიფტმა Spotify-ზე კიდევ ერთი რეკორდი დაამყარა, თან მომღერალმა საკუთარ თავს აჯობა! ტეილორის ალბომი 1989 (Taylor's Version) 27 ოქტომბრის დილას გამოვიდა და Spotify-ზე რეკორდი მაშინვე მოხსნა. ალბომმა 1989 (Taylor’s Version) ერთ დღეში მოსმენების რაოდენობით რეკორდი დაამყარა. მომღერალმა იგივე რეკორდი 2022 წლის 21 ოქტომბერს დაამყარა, როცა მისი ალბომი Midnights გამოვიდა.

შეგახსენებთ, რომ ტეილორ სვიფტი 29 აგვისტოს Spotify-ის ისტორიაში პირველი ქალი მუსიკოსი გახდა, რომელსაც თვეში 100 მილიონი მსმენელი ჰყავს. ამ თვეში ეს ტეილორის წარმატებების მცირე ჩამონათვალია, რადგან Bloomberg-ის მიხედვით, სვიფტის ქონების ღირებულებამ რამდენიმე დღის წინ $1,1 მილიარდი შეადგინა.

ტეილორ სვიფტმა თავისი 6 ალბომის ახალი ვერსიების ჩაწერა რამდენიმე წლის წინ დაიწყო, რადგან მისმა ყოფილმა ლეიბლმა, Big Machine-მა, მომღერლის ჩანაწერების ნაწილი 2019 წელს გაყიდა. სვიფტი ძველი ალბომების განახლებულ ვერსიებს თავიდან უშვებს, რათა საავტორო უფლებები მხოლოდ მას ეკუთვნოდეს. წელს მან ორი ძველი ალბომიც ჩაწერა ხელახლა — Speak Now (Taylor's Version) 7 ივლისს გამოვიდა, 1989 (Taylor's Version) კი — 27 ოქტომბერს.

ამ ყველაფრის პარალელურად კი ტეილორის ტურნე, სახელად The Eras Tour, მსოფლიო მასშტაბით 2024 წლის ჩათვლით გაგრძელდება.