შსს-ს ცნობით, სამართალდამცავებმა მოზარდების დაჭრის საქმეზე, 2000 წელს დაბადებული ა.ნ. ჯანმრთელობის განზრახ მძიმე დაზიანების ბრალდებით დააკავეს. მის მიერ ჩადენილი დანაშაული 3-დან 6 წლამდე ვადით თავისუფლების აღკვეთას ითვალისწინებს.

გამოძიების ვერსიით, ალ.ყაზბეგის გამზირზე, ე.წ. წითელი ბაღის ტერიტორიაზე, ბრალდებულმა ურთიერთშელაპარაკებისას ყოფილ თანაკლასელებს - 2000 წელს დაბადებულ ნ.ც.-ს და 2000 წელს დაბადებულ ი.ც.-ს ცივი იარაღით მუცლისა და გულმკერდის არეში თითო ჭრილობა, ხოლო 2000 წელს დაბადებულ ლ.ხ.-ს ხელზე მსუბუქი ჭრილობა მიაყენა და შემთხვევის ადგილიდან მიიმალა.

დაჭრილი არასრულწლოვნები რესპუბლიკურ საავადმყოფოში იმყოფებიან. კლინიკის პრესსამსახურმა On.ge-ს უთხრა, რომ ორივე პაციენტი მიმღებ გადაუდებელ დეპარტამენტში, დაკვირვებისა და მკურნალობის ქვეშ რჩება. მისივე თქმით მოზარდების მდგომარეობა სტაბილურია და მათ სიცოცხლეს საფრთხე არ ემუქრება.

რესპუბლიკური საავადმყოფოს ექიმის თქმით, პაციენტებს აღენიშნება გულ-მკერდის წინა ზედაპირზე, მარცხენა ნახევარში, ნაკვეთ-ნაჩხვლეტი ჭრილობა.

სამართალდამცველებმა ბრალდებული ცხელ კვალზე, თბილისში დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო.

გამოძიება სისხლის სამართლის კოდექსის 117-ე მუხლით, ჯანმრთელობის განზრახ მძიმე დაზიანების ფაქტზე მიმდინარეობს.

მოზარდების დაპირისპირების საქმეები

მოზარდებს შორის დაპირისპირების ფაქტები გასული წლის ბოლოსაც მოხდა. პირველ დეკემბერს, თბილისში, ხორავას ქუჩაზე არასრულწლოვნებს შორის ურთიერთშელაპარაკების შედეგად ორი მოზარდი მოკლეს. ლევან დადუნაშვილი საავადმყოფოში მიყვანამდე გარდაიცვალა. დავით სარალიძეს საავადმყოფოში სამი ოპერაცია გაუკეთდა, თუმცა ის მომხდარიდან მეორე დღეს გარდაიცვალა. მას 14-მდე ჭრილობა ჰქონდა მიყენებული სხეულზე. მკვლელობის ბრალდება ორ არასრულწლოვანს წაუყენეს. ორივე მათგანი დაკავებულია.

ხორავას ქუჩის ინციდენტიდან მეორე დღეს, 2 დეკემბერს წყალტუბოში მოზარდი მისმა კლასელმა დანით მოკლა. შსს-ს განცხადებით, 18 წლის ბრალდებული თბილისში დააკავეს. გამოძიება განზრახ მკვლელობის ფაქტზე მიმდინარეობს.

19 დეკემბერს კი თბილისში, რუსთაველის გამზირზე მდებარე სკვერში, მოზარდს ცივი იარაღით რამდენიმე ჭრილობა მიაყენეს. შსს-ს ინფორმაციით, ბრალდებული ასევე არასრულწლოვანია და ის მომხდარიდან ორ დღეში დააკავეს.